Fjárhagsaðstoð hækkuð og grunnþjónusta í velferðarmálum varin

 

                                        22.desember 2008
                                                                                                         

 

Í fjárhagsáætlun fyrir Velferðarsvið fyrir árið 2009 er grunnfjárhæð fjárhagsaðstoðar hækkuð um 16,35% og gerð að bundnum lið til að tryggja fjárhagsaðstoð fyrir þá sem eiga til þess rétt.  Lögð er sérstök áhersla á aðstoð vegna barna og húsnæðismála. Í samræmi við áherslur borgarstjóra er grunnþjónusta varin, störf varin og gjaldskrár ekki hækkaðar. Framlög til velferðarmála nema 9,1 milljarði króna sem er nær 20% hækkun á framlögum milli ára.

Samkvæmt frumvarpi að fjárhagsáætlun Velferðarsviðs fyrir árið 2009, sem kynnt var á fundi borgarstjórnar í dag, mun Reykjavíkurborg verja 9.136.379 krónum til velferðarmála. Skv. þessu eykst fjármagn til málaflokksins um 19,3% frá útkomuspá 2008. Þannig leggur velferðarráð áherslu á að verja grunnþjónustu borgarinnar í velferðarmálum, þrátt fyrir gjörbreyttar forsendur, því um leið og sveitarfélög þurfa að búa sig undir vaxandi þörf fyrir velferðarþjónustu horfa þau fram á verulegan samdrátt í tekjum. Í ljósi þess hefur verið skerpt á forgangsröðun og verða áhersluatriði í fjárhagsáætlun og starfi Velferðarsviðs á næsta ári eftirfarandi:

 

Tryggja fjárhagsaðstoð fyrir þá sem eiga  á henni rétt..  Grunnfjárhæð fjárhagsaðstoðar er hækkuð skv. frumvarpi um 16,35%. Forsendur frumvarpsins gera ráð fyrir 7% atvinnuleysi og að fjárhagsaðstoð nemi allt að 2,1 milljarði króna sem er 87% hækkun á framlagi til fjárhagsaðstoðar milli ára. Vegna mikillar óvissu um hvernig atvinnuleysi mun þróast hefur jafnframt verið ákveðið að fjárhagsaðstoð verði bundinn liður, sem þýðir að aukist þörf fyrir fjárhagsaðstoð mun borgarsjóður koma til móts við aukin útgjöld. Heimildargreiðslur vegna barna verða hækkaðar og verða bundinn liður, en af heimildargreiðslum vegna barna má m.a. greiða skólamáltíðir, leikskóla og frístundaheimili. Þannig er lögð sérstök áhersla á að tryggja sem best hag barna.

 

Tryggja aðstoð vegna húsnæðismála. Vegna óvissu um þróun á fjölda þeirra sem fá húsaleigubætur og óvissu um aðkomu jöfnunarsjóðs sveitarfélaga verða húsaleigubætur bundinn liður og verði aukning á útgjöldum umfram áætlun mun borgarsjóður koma til móts við þau. Þannig vill velferðarráð tryggja að þeir sem eigi rétt á húsaleigubótum fái þær og að aukning skerði ekki aðra þjónustu sviðsins. Biðlisti eftir félagslegu leiguhúsnæði hefur aukist undanfarna mánuði. Velferðarráð hefur því einnig samþykkt að fela Félagsbústöðum að auglýsa eftir leiguíbúðum á almennum markaði til endurleigu fyrir þá sem eru á biðlista eftir húsnæði á vegum sviðsins.

Vernda grunnþjónustu fyrir aldraða, sjúka, fatlaða og börn og ungmenni.  Fjármagn til félagslegrar heimaþjónustu verður varið, sama gildir um rekstur þjónustuíbúða og búsetukjarna fyrir fatlaða, rekstur barnaverndarþjónustu og barnaverndarúrræða, þ.m.t. heimili fyrir börn. Um áramót er áætlað að rekstur heimahjúkrunar á höfuðborgarsvæðinu verði færður yfir til borgarinnar og stjórnun félagslegrar heimaþjónustu og heimahjúkrunar sameinaður. Þannig fæst aukin yfirsýn yfir málaflokkinn og tækifæri gefst til að vernda þjónustuna enn frekar. Í frumvarpinu er jafnframt gert ráð fyrir aukinni heimaþjónustu fyrir geðfatlaða í búsetukjörnum borgarinnar, en sú aukning nemur um 130 milljónum króna. Gert er ráð fyrir 15 milljón króna framlagi til að hefja rekstur heimilis fyrir heimilislausar konur og 17 milljón króna framlagi til að fylgja eftir stefnumótun í málefnum utangarðsfólks.

Veita þjónustu til að styðja við andlega heilsu fullorðinna einstaklinga og þeirra sem  eru atvinnulausir.  Undanfarnar vikur hefur starfsfólk Velferðarsviðs lyft grettistaki til að forgangasraða verkefnum til að auka aðgengi að félagslegri og sálfræðilegri ráðgjöf fyrir íbúa borgarinnar. Í starfsáætlun Velferðarsviðs er gert ráð fyrir auknu framboði námskeiða og verkefna til að styðja við virkni þeirra sem þurfa að glíma við atvinnuleysi.

Vinna markvisst að aukinni kostnaðarhagræðingu. Það er ljóst að forgangsröðun grunnþjónustunnar og áhersla á framlínuþjónustu við íbúa borgarinnar kallar á ýmsar breytingar sem m.a. felast í endurskipulagningu þjónustu og verkefna. Jafnframt er lögð mikil áhersla á hagræðingu í rekstri sviðsins. Ekki er gert ráð fyrir fjölgun starfsfólks og dregið verður úr yfirvinnu. Jafnframt er dregið úr fræðslu-, ferða- og kynningarkostnaði og aðkeyptri vinnu. Sérstakt átak verður gert til hagræðingar í innkaupum. Markvisst verður haldið áfram að leita leiða til kostnaðarhagræðingu í öllum rekstrarþáttum, þ.m.t. húsnæðismálum og upplýsingatæknimálum.

 

Athugasemdir

[Óskar Arnórsson, 24.12.2008 kl. 18:53]

Hvað hjálpaði Velferðarráð mörgum þetta árið? Þetta Velferðarráð hefur aldrei virkað fyrir neinn sem ég þekki, og þekki marga í þessum geira. Ég trúði þessu ekki og sendi fínt bréfs til Velferðarráðs, vegna manns sem er heilalaus í bili.

Allir þekkja hann, nema hann. 'eg hringdi og spurði um erindið, og já, já það gerðu allir. Aftur og aftur hringdi ég og spurði hvort ég ætti að koma og svara einhverjum spurningum? Nei, nei þess þurfti ekki heldur.

Svona "silent treatment" afferða- og vinnabragða Velferðarráðs er með þvílýkum   ólíkindum, ég varð gáttaður. Veit vel hvernig þessi stofnun ætti að virka, enn þeir sem stýra þessu, kunna ekki til verka.

Annars eru allir með eindæmum kurteisir og skilja málavöxtu svo vel! Fyrir mig, bý í Svíþjóð, varð 2ja ára ferðalag til Íslands nærri til að setja mig á hausinn. Á það að vera einhver lúxus að eiga íbúð á Íslandi? Eða leigja? Eða lifa?

Velferðarráð þarf bara 2 í starfi sem þar er unnið í raunveruleikanum. Ódýrara gagnsleysi. Farið að sinna þeim sem þið eigið að sinna. Borgarfulltrúi nær sjálfsagt betra sambandi við þessar geimverur sem vinna þarna, enn ég. (Afsakaðu orðbragðið.)

  Það þyrfti að hafa árlega keppni í hver væri bestur og verstur í stjórnun ólíkra stofnanna. Þetta sem kallst "hagræðing". Bókhaldarar, hagfræðingar sem eru búnir eru að rúinera heilt land, er það besta sem þeir eru búnir að afreka. Góð menntun upp á gott og vont.

Þú skrifar: 

"Tryggja aðstoð vegna húsnæðismála. Vegna óvissu um þróun á fjölda þeirra sem fá húsaleigubætur og óvissu um aðkomu jöfnunarsjóðs sveitarfélaga verða húsaleigubætur bundinn liður og verði aukning á útgjöldum umfram áætlun mun borgarsjóður koma til móts við þau. Þannig vill velferðarráð tryggja að þeir sem eigi rétt á húsaleigubótum fái þær og að aukning skerði ekki aðra þjónustu sviðsins. Biðlisti eftir félagslegu leiguhúsnæði hefur aukist undanfarna mánuði. Velferðarráð hefur því einnig samþykkt að fela Félagsbústöðum að auglýsa eftir leiguíbúðum á almennum markaði til endurleigu fyrir þá sem eru á biðlista eftir húsnæði á vegum sviðsins."

Er eitthvað að marka þetta? 'eg yrði steinhissa ef þetta væri gert, í alvöru. 

Ég er að flytja til Svíþjóðar sem efnahagslegur flóttamaður, einn af mörgum.