Tímamótasamstarf heilbrigðis- og velferðarþjónustu í Árbæ

Það verða ákveðin tímamót í haust þegar Heilsugæsla Árbæjar og Þjónustumiðstöð Árbæjar og Grafarholts flytjast undir sama þak í nýju og sérhönnuðu húsnæði. Skrifað var undir leigusamninga þess efnis þann 14. mars síðastliðinn.

Samhliða flutningi þessara tveggja þjónustuþátta í sama húsnæði skapast tækifæri til þess að auka samstarf þeirra á milli.  Það tækifæri látum við ekki renna okkur úr greipum og því var jafnframt skrifað undir sérstakan samstarfssamning um leið og skrifað var undir leigusamningana.

Til þess að samstarfið verði svo farsælt sem frekast er kostur var ákveðið að skipa fjögurra manna samráðsnefnd með fulltrúum beggja aðila til að móta nánara og formfastara samstarf. Fulltrúar í samstarfsnefndinni verða þau Margrét Gunnarsdóttir hjúkrunarstjóri Heilsugæslu Árbæjar, Haraldur Ó. Tómasson, læknir,  Sólveig Reynisdóttir framkv.stj. Þjónustumiðstöðvar Árbæjar og Grafarvogs og Þorgeir Magnússon deildarstjóri/sálfræðingur.  

Hvort tveggja, heilsugæsla og velferðarþjónusta, eru mikilvægar nærþjónustur við íbúa hvers svæðis. Margir einstaklingar eru í senn skjólstæðingar Heilsugæslunnar og Velferðarþjónustunnar.  Aukin samvinna býður upp á marga möguleika, s.s. sameiginleg námskeið fyrir skjólstæðinga og starfsmenn, aukna samvinnu starfsmanna, aukið upplýsingaflæði og aukin þægindi jafnt fyrir skjólstæðingana sjálfa sem og aðstandendur þeirra, svo fátt eitt sé talið.

Tilvalið er að nýta það tækifæri sem hér gefst til að koma á nánara samstarfi þessara stofnana, bæði hvað varðar skipulag á þjónustu við sameiginlega skjólstæðinga og þjónustuframboð almennt. Markmið aukins samstarfs eru meðal annars að:

•·         auka skilvirkni þjónustuþáttanna

•·         auka gæði þjónustunnar

•·         kanna mögulega samþættingu þjónustunnar

•·         kanna lögformlegan og hagrænan grundvöll fyrir ennþá frekara samstarfi heilsugæslu og Velferðarsviðs

•·         kanna möguleikann á sameiginlegri móttöku skjólstæðinga auk annarrar samnýtingar húsnæðis.

Fróðlegt verður að fylgjast með vinnu samráðsnefndarinnar og sjá hverjar niðurstöður hennar verða. Það er ótvíræður vilji bæði Heilbrigðisráðuneytis og Borgaryfirvalda að auka þetta samstarf sem frekast er kostur.

Úr grein sem ég birti í Morgunblaðinu 3. apríl síðastliðinn